Başqa haberler
Info Center
  Bağçasarayda "Devlet-Saray" memuriy-medeniy merkezi meydanğa ketirilecek

2014 senesi yanvarniñ 13-de Bağçasarayda qırımtatar halqınıñ bir sıra tarih ve medeniyet yadikârlıqlarınıñ alı meseleleri boyunca Qırımtatar Milliy Meclisi tarafından teşkil etilgen iş toplaşuvı ötkerildi.  

Muşaverede Ukraina halq deputatı Mustafa Cemilev, Qırım musulmanları müftisi haci Emirali Ablayev, Bağçasaray regional meclisiniñ azaları, "Qırım" Fondu" Hayriye teşkilâtınıñ Baş müdiri Riza Şevkiyev, "Larişes" şahsiy Qırım tarihiy müzeyiniñ tesisçisi Güliver Altin iştirak ettiler. 
Körüşüv devamında "Qırım"Fondu" tarafından azırlanılğan "Devlet-Saray" memuriy-medeniy merkeziniñ leyhası tafsilâtlı sürette baqıldı.
İşbu leyhağa binaen, maarifçi İsmail Gasprinskiynen bağlı olğan tarihiy binada "Larişes" tarih müzeyi, konferentsiya salonı, resmiy eyyetlerni qabul etüv salonı, Qırım musulmanları diniy idaresi ve "Qırım" Fondu" Hayriye teşkilâtınıñ memuriy-temsil odaları yerleşecek. 
Mezkür leyhanı yerine ketirüv qırımtatar halqı sürgünliginiñ 70 yıllığına bağışlanğan bir sıra tedbirlerni keçirmek, Ukraina ve çetel eyyetlerniñ körüşüvlerini malümat ve teşkil etüv ceetten keyfiyetli temin etmek, qırımtatar halqınıñ tarihiy merkezi - Bağçasaray şeerine - cemaat diqqatını celp etmege yardım etecektir. 
Memuriy-medeniy merkezni açmaq ğayesini ömürge keçirmek içün  "Qırım" Fondu" HT sponsorlarğa muracaat etti. Metsenat, Qırımtatar Milliy Meclisi Reisiniñ muavini ve QHİAB İdare Başı Aslan Ömer Qırımlı işbu leyhağa maddiy yardım köstermege azır olğanını bildirdi. 
Tamir işleri aqımdaki seneniñ yanvar ayında başlanmalı.
larishes_2 
Malümat: "Devlet-Saray" tarihiy-memuriy kompleksi Bağçasaraydaki Salaçıqta (Staroselye), Qırım hanlığınıñ birinci paytahtı - Qırq-yerniñ - saray kompleksi territoriyasında yerleşe. Şimdiki vaqıtta saray kompleksiniñ Mengli Girey-Han Türbesini baqmaq mümkün, mında ükümran qorantanıñ on sekiz azası, şu cümleden Haci Girey de defin etilgen. Türbe yanında tahminen XV as. ait olğan cami binası yerleşe. Aynı bu yerde hanlar devriniñ Qırımda saqlanıp qalğan yekâne aliy oquv yurtı - meşur "Zıncırlı" medrese binası - yerleşmekte.  Qırım hanlığı vaqtına ait olğan obyektlerden ğayrı, bu yerde meşur qırımtatar maarifçi, muarrir ve yazıcı İ.Gasprinskiy (1851-1914) mezarı, Amet Özenbaşlınıñ mezarı, em de yuqarıda añılğan Zıncırlı medreseniñ yañı binası (1909 s.) yerleşmekte. 
qtmm.org malümatından
Artqa