Başqa haberler
Info Center
  QHİAB Komiteti Başı Mehti İslamov halqara derece quyumcu unvanına nail oldı

Islamov

Noyabrniň 14-19-de  “KiyevEkspoPlaza” Sergi Merkezinde “Quyumcı Ekspo Ukraina” sergisi taqdim olundı. Sergide Ukraina ve çetel memleketlerden yetekçi istisalcılar iştirak ettiler.

Serginiň esas vaqiası Noyabrniň 16-da teşkil etilgen Karl Faberje adına Memorial Vaqfı mukâfatınen Ukrainanın eň yahşı quyumcılarını tantanalı mukâfatlandırma tedbiridir.

Ülkeniň eň usta 20 quyumcılarına nişan ve fahriy işaretler taqdim etildi. Olarnıň arasında belli qırımtatar quyumcısı, “Dülber” quyumcı eviniň genel müdiri, QHİAB qıymetli madenler ve quyumcı mahsullar boyunca Komitetiniň yolbaşçısı Mehti İslamov da bulundı.

M. İslamov “Halqara derecesinde nam qazanğan quyumcı” unvanına ve ekinci derece nişanına nail oldı. Şunı qayd etmek kerek ki, dünya boyunca böyle nişannen tek 8 inşan taqdirlengendir.

Belli olğanı kibi, ekinci derece nişan dekoratif-ameliy sanatına, dünya medeniy mirasını saqlanmasına salmaqlı hisse qoşqanlarğa berile.

M. Islamov

Bundan ğayrı mukâfatlandırma merasiminde Mehti İslamov “Müsülman dünyasınıň Fahriy quyumcısı” nişanınıň de sahibi oldı.

“Böyle tür nişanlarnı daha Rusya İmperatorluğı zamanları taqdim ete ediler.  İşbu nişan 001 nomeri altında buluna  ve dünyada men bu unvanğa nail olğan birinci müslüman quyumcısı olğanımı bildire” – dep qayd etti M. İslamov.

Qırım Halqara İş Adamları Birleşmesi adından Mehti beyni yaňı qazançlarnen can-yürekten hayırlaymız. Meraqlı ğayeler ve mesleki muvafaqiyetlerge irişmekni tileymiz. Yıl-yıldan böyle yüksek mukâfatlar sayısı hep çoqlaşsın!

QHİAB bildirisi

Artqa